ចក្ខុវិស័យ បេសកកម្ម និងតួនាទីរបស់ ប.ស.ស

     ចក្ខុវិស័យ បេសកកម្ម និង តួនាទីភារកិច្ចរបស់ ប.ស.ស

          ចក្ខុវិស័យ

          ចក្ខុវិស័យរបស់បេឡាជាតិរបបសន្តិសុខសង្គម គឺដើម្បីក្លាយជាអង្គភាពនាំមុខគេក្នុងការផ្តល់ សេវាសន្តិសុខសង្គម ជូនដល់សមាជិកទាំងអស់ដែលបានចុះបញ្ជិកា ។

          បេសកកម្ម

          បេសកកម្មរបស់បេឡាជាតិរបបសន្តិសុខសង្គម គឺដើម្បីបម្រើសេវាកម្មផ្នែកហានិភ័យការងារ ដល់សមាជិកទាំងអស់ដែលបានចុះបញ្ជិកាទាន់ពេលវេលា ដើម្បីជួយបន្ថយបន្ទុកក្នុងសង្គម និង ជួយលើកកម្ពស់ស្ថិរភាពសង្គម ។

          តួនាទីភារកិច្ច

          យោងតាមមាត្រា៣​ នៃអនុក្រឹត្យលេខ១៦ អនក្រ.បក ចុះថ្ងៃទី ០២ ខែ មីនា ឆ្នាំ ២០០៧ ស្តីពី ការបង្កើតបេឡាជាតិរបបសន្តិសុខសង្គមចែងថា ប.ស.ស មានតួនាទីភារកិច្ចមួយចំនួន ដូចខាង ក្រោម៖

-          គ្រប់គ្រងរបបសន្តិសុខសង្គម ដោយអនុលោមតាមច្បាប់ស្តីពីរបបសន្តិសុខសង្គមសម្រាប់ជន ទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ។

-          អង្កេតហានិភ័យការងារ

-          រក្សាទុកនូវបណ្ណសារនិយោជក និង កម្មករនិយោជិត

-          កំណត់ ផ្តល់ និង រក្សាទុកតាវកាលិកសម្រាប់សមាជិកនៃ ប.ស.ស

-          ដាក់ឲ្យអនុវត្តបទប្បញ្ញត្តិនៃអនុក្រឹត្យ និង ច្បាប់ស្តីពីរបបសន្តិសុខសង្គមសម្រាប់ជនទាំងឡាយ ដែលស្ថិតក្រោមបទប្បញ្ញត្តិនៃច្បាប់ស្តីពីការងារ និង ពិន័យចំពោះការបង់ភាគទានយឺតយូរ

-          សិក្សាស្រាវជ្រាវដើម្បីរៀបចំផែនការរបបសន្តិសុខសង្គម

-          ធានាផ្តល់ឲ្យបានសមស្របនូវតាវកាលិកទាំងឡាយសម្រាប់សមាជិក ប.ស.ស ក្នុងគោលដៅជួយសម្រាលការលំបាកនានានៅពេល ជរាភាព ទុព្វលភាព មរណភាព ហានិភ័យការងារ ឬ ពេលជួបប្រទះយថាភាពផ្សេងៗទៀតដូចជាជំងឺ  និង មាតុភាពជាដើម ។

-          ប្រមូលភាគទានពីសមាជិករបស់ ប.ស.ស និង និយោជក ។

-          សម្របសម្រួល និង រៀបចំឲ្យមានសេវាកម្មផ្នែកសុខាភិបាល និង សង្គមកិច្ចសម្រាប់ជា ប្រយោជន៍ដល់សមាជិករបស់ខ្លួន ។

-          សហការណ៍ជាមួយអង្គភាពពាក់ព័ន្ធដើម្បី៖

-          អប់រំផ្សព្វផ្សាយអំពីរបៀបបង្ការគ្រោះថ្នាក់ការងារ និង ជំងឺវិជ្ជាជីវៈ

-          ចាត់វិធានការផ្នែកបច្ចេកទេសសន្តិសុខ និង អនាម័យការងារ ។

-          សហការណ៍ជាមួយអង្គភាពពាក់ព័ន្ធដើម្បីសិក្សាស្រាវជ្រាវ និង អង្កេតហានិភ័យការងារ ។

-          ចាត់ចែង និង គ្រប់គ្រងការវិនិយោគមូលនិធិសន្តិសុខសង្គម ។

Read More

History of NSSF_ប្រវត្តិរបស់ ប.ស.ស

ប្រវត្តិរបស់ ប.ស.ស

          របបសន្តិសុខសង្គមនៅក្នុងព្រះរាជាណាចក្រកម្ពុជា មិនមែនទើបតែបង្កើតឡើងទេ វាត្រូវបាន បង្កើតឡើងតាំងពីឆ្នាំ ១៩៥៥ មកម្ល៉េះ គឺត្រូវបានបង្កើតឡើងដោយព្រះរាជក្រឹត្យលេខ ៥៥ និង ព្រះរាជក្រឹត្យលេខ ៣០៦ ។ លុះមកដល់របបកម្ពុជាប្រជាធិបតេយ្យ ពីឆ្នាំ ១៩៧៥ ដល់ឆ្នាំ ១៩៧៩ របបសន្តិសុខសង្គមនេះ ត្រូវបានលុបចោលទាំងស្រុង ។ ចាប់ពីឆ្នាំ ១៩៧៩ ដល់ឆ្នាំ ១៩៩៣ ក៏របបសន្តិ សុខសង្គមនេះមិនទាន់បានចាប់កំណើតវិញនៅឡើយទេ ប៉ុន្តែនៅក្នុងអំឡុងពេលនេះប្រជាពលរដ្ឋ ទាំងអស់នៅទូទាំងប្រទេសគឺទទួលបានសេវាថែទាំសុខភាពដោយឥតគិតថ្លៃ និង ដោយស្មើភាពគ្នា មិនថាអ្នកជនបទ ឬ អ្នកក្រុង អ្នកមាន ឬ អ្នកក្រនោះទេ សុទ្ធតែអាចទទួលបានសេវាស្មើៗគ្នា ។

          នៅក្រោយការបោះឆ្នោតឆ្នាំ ១៩៩៣ ដែលរៀបចំឡើងដោយ អ៊ុនតាក់ រួចមកនាយកដ្ឋាន សន្តិសុខសង្គម ក៏ត្រូវបានបង្កើតឡើងវិញ ដែលនាយកដ្ឋាននេះមានតួនាទីទទួលខុសត្រូវរៀបចំនូវ រាល់ប្រកាស និង លិខិតបទដ្ឋានគតិយុត្តិសម្រាប់អនុវត្តកិច្ចគាំពារសន្តិសុខសង្គម ដល់ប្រជាជន និង ជនដែលធ្វើការក្នុងវិស័យឯកជន ។ រហូតមកដល់ឆ្នាំ ២០០២ រដ្ឋសភាជាតិក៏បានអនុមតិច្បាប់ស្តីពី របបសន្តិសុខសង្គមសម្រាប់ជនទាំងឡាយដែលស្ថិតក្រោមបទប្បញ្ញត្តិនៃច្បាប់ស្ពីពីការងារឡើង  ។

          នៅឆ្នាំ ២០០៧ បេឡាជាតិរបបសន្តិសុខសង្គម ដែលហៅកាត់ថា (ប.ស.ស) ក៏ត្រូវបានបង្កើតឡើងដោយអនុក្រឹត្យលេខ ១៦ អនក្រ.បក ចុះថ្ងៃទី ០២ ខែ មីនា ឆ្នាំ​ ២០០៧[1] ដើម្បីជំនួសនាយកដ្ឋានសន្តិសុខសង្គមវិញ ។ បេឡាជាតិរបបសន្តិសុខសង្គមនេះ ត្រូវបានបង្កើត ឡើងដើម្បីគ្រប់គ្រង កិច្ចការផ្នែកកិច្ចគាំពារសន្តិសុខសង្គមឲ្យស្របទៅតាមច្បាប់ស្តីពីសន្តិសុខសង្គម និង លិខិតបទ ដ្ឋានគតិយុត្តិនានាដែលពាក់ព័ន្ធ ។ ក្រោយការរៀបចំអស់រយៈពេលជាយូរមកនេះ ទើប ប.ស.ស អាចដំណើរការបាន នៅចុងឆ្នាំ ២០០៨ ។

     សញ្ញារបស់ ប.ស.ស

          សញ្ញារបស់ ប.ស.ស ត្រូវបានបង្កើតឡើងដោយប្រកាសរបស់ក្រសួងការងារ និង បណ្តុះ       បណ្តាលវិជ្ជាជីវៈលេខ ២៣៣ កប/ប្រក ចុះថ្ងៃទី ២៥ ខែ វិច្ឆិកា ឆ្នាំ ២០០៨ ។

សញ្ញានេះមានរូបសណ្ឋាន និង អត្ថន័យដូចខាងក្រោម[2]៖

 

-        រូបរាងទាំងមូល មានរាងមូលព័ទ្ធដោយកួរស្រូវរាងស្នែងក្របីពណ៌ទឹកមាស រូបរាងខាងក្នុងមាន រូបមនុស្សប្រុស-ស្រី នៅខាងក្នុងកងចក្រ និង គម្របពណ៌ទឹកសមុទ្ររាងជាពាក់កណ្តាល រង្វង់ ។ នៅលើផ្ទៃគម្របកងចក្រមានសរសេរអក្សរ “ប.ស.ស” និង “NSSF” ។ ព័ទ្ធជុំវិញ កងចក្រមានផ្តុំតួអក្សររាងជារង្វង់ដាក់ថា “បេឡាជាតិរបបសន្តិសុខសង្គម” និង “National Social Security Fund” ។

-        កួរស្រូវពណ៌ទឹកមាសមាន ៩ ថ្នាក់ តំណាងនូវតាវកាលិកទាំងប្រាំបួន ដែលត្រូវអនុវត្តជាជំហានៗ តាមស្ថានភាពសេដ្ឋកិច្ច និង សង្គម ។

-        អក្សរបេឡាជាតិរបបសន្តិសុខសង្គម និង National Social Security Fund ពណ៌ទឹកសមុទ្រ រាងជារង្វង់ តំណាងឈ្មោះគ្រឹះស្ថានសាធារណៈរដ្ឋបាល ដែលមានបេសកម្មក្នុងការគ្រប់គ្រង និង ចាត់ចែងរបបសន្តិសុខសង្គមសម្រាប់ជនទាំងឡាយដែលស្ថិតនៅក្រោមបទ ប្បញ្ញត្តិនៃច្បាប់ស្តីពីការងារ ។

-        រូបពាក់កណ្តាលរង្វង់គ្របពីលើកងចក្រ ពណ៌ទឹកសមុទ្រ ដែលមានអក្សរ ប.ស.ស និង NSSF ពណ៌ស តំណាងនូវការការពារហានិភ័យសង្គមចំពោះកម្មករនិយោជិត ដែលស្ថិត នៅក្រោម បទប្បញ្ញត្តិនៃច្បាប់ស្តីពីការងារ ។

-        រូបកងចក្រពាក់កណ្តាលរង្វង់ពណ៌ទឹកសមុទ្រ តំណាងនូវការចូលរួមពីវិស័យឯកជន ។ រីឯ កាំកងចក្រចំនួន ៩ តំណាងនូវសមាសភាពក្រុមប្រឹក្សាភិបាលនៃបេឡាជាតិរបបសន្តិសុខសង្គម ទាំង ៩ រូប ។

-        រូបមនុស្ស ប្រុស-ស្រី ស្ថិតនៅខាងក្នុងកងចក្រ តំណាងនូវកម្មករនិយោជិត ដែលត្រូវទទួលបាន ការការពារពីរបបសន្តិសុខសង្គមតាមច្បាប់ ។

សញ្ញារបស់បេឡាជាតិរបបសន្តិសុខសង្គមត្រូវបានប្រើប្រាស់ជាផ្លូវការដូចខាងក្រោម[3]៖

-        ប្រើប្រាស់លើក្បាលលិខិតជាផ្លូវការរបស់អង្គភាព

-        ដាក់នៅកន្លែងធ្វើការ

-        ពាក់នៅលើឯកសណ្ឋានមន្ត្រីរាជការរបស់អង្គភាព

ប្រើប្រាស់ជាផ្លូវការផ្សេងៗ ។

---

[1] អនុក្រឹត្យលេខ ១៦ អនក្រ.បក ចុះថ្ងៃទី ០២ ខែមីនា ឆ្នាំ ២០០៧ ស្តីពី ការបង្កើតបេឡាជាតិរបបសន្តិសុខសង្គម

[2] ប្រការ២ នៃប្រកាសលេខ ២៣៣ កប.ប្រក ចុះថ្ងៃទី ២៥ -វិច្ឆិកា-២០០៨ ស្តីពី ការបង្កើតសញ្ញារបស់បេឡាជាតិរបបសន្តិសុខសង្គម

[3] ប្រការ៣ នៃប្រកាស  ស្តីពី ការបង្កើតសញ្ញារបស់បេឡាជាតិរបបសន្តិសុខសង្គម

Read More

វាកស័ព្ទសំខាន់ដែលប្រើក្នុងរបបសន្តិសុខសង្គម (NSSF)

វាក្យស័ព្ទបច្ចេកទេសដែលប្រើក្នុង ប.ស.ស

         វាក្យស័ព្ទបច្ចេកទេសទាំងនេះ គឺមានអត្ថន័យយោងទៅតាមច្បាប់ការងារ និង លិខិតបទដ្ឋាន គតិយុត្តពាក់ព័ន្ធនឹងរបបសន្តិសុខសង្គម ចំពោះអត្ថន័យទៅតាមបែប   បរិបទខាងក្រៅ ឬ តាមលិខិត បទដ្ឋានគតិយុត្តិផ្សេងៗ យ៉ាងណានោះ គឺមិនមានការប្រែប្រួល និង មានន័យទៅតាមវិស័យនីមួយៗ ដែលបានកំណត់ ។

          វាក្យស័ព្ទទាំង

នេះ គឺអ្នកសរសេរបានធ្វើការរៀបរៀងទៅតាម លំដាប់អក្ខរក្រមរបស់ខ្មែរ ។

ក

១.   កញ្ចប់តាវកាលិក                                 ៖   សំដៅដល់សេវាព្យាបាលថែទាំវេជ្ជសាស្ត្រ សេវាបញ្ជូនជនរងគ្រោះ សេវាបញ្ជូនសព និង ប្រាក់បំណាច់ប្រចាំថ្ងៃ ។

២.  កាលាទិករណ៍                                        ៖   ដែលមានមុនពេលកំណត់ ។

៣.   កិច្ចព្រមព្រៀង                                       ៖   សំដៅដល់នីតិវិធី និង បែបបទនៃការផ្តល់សេវា សុខាភិបាលដោយមូលដ្ឋានសុខាភិបាល និង ការប្រើប្រាស់សេវាសុខាភិបាល របស់សមាជិក បេឡាជាតិរបបសន្តិសុខសង្គម ។

គ

៤.   គ្រោះថ្នាក់ការងារ                                 ៖   គ្រោះថ្នាក់ ដែលធ្លាក់មកលើរូបកាយមន្រ្តីសាធារ ណៈ កម្មករនិយោជិត ដោយធ្វើការ ឬ ពេលធ្វើការជូនក្រសួង ស្ថាប័ន អង្គភាព ឬ ក្រុមហ៊ុនរបស់ ខ្លួន ។

៥.   គ្រោះថ្នាក់ពេលធ្វើដំណើរ                    ៖   គ្រោះថ្នាក់ ដែលធ្លាក់មកលើរូបកាយមន្រ្តីសាធារ ណៈ កម្មករនិយោជិត ពេលធ្វើដំណើរពីលំនៅឋានត្រង់ឆ្ពោះទៅកន្លែងធ្វើការ ឬ វិលមកវិញដោយគ្មានឈប់ ឬ វាងទៅកន្លែងផ្សេងជាប្រយោជន៍ផ្ទាល់ខ្លួន ក្រៅពីការងារដែលក្រសួង ស្ថាប័ន អង្គភាព ឬ ក្រុមហ៊ុនតម្រូវឲ្យទៅ ។

ជ

៦.   ជំងឺវិជ្ជាជីវៈ                                          ៖   ជំងឺនានា ដែលកើតឡើងដោយមានមូលហេតុពី ការងារ ឬ ពាក់ព័ន្ធនឹងការងារ ទោះជាជំងឺនោះកើតឡើងក្នុងកំឡុងពេលបំពេញការងារ ឬ ក្នុងពេលណាមួយ ក្រោយពេលបំពេញការងារក៏ដោយ ។

៧.   ជរាភាព                                                  ៖   ភាពចាស់ទ្រុឌទ្រោម

ត

៨.      តាវកាលិក                                         ៖   ការផ្តល់សេវាបង្ការសុខភាព សេវាព្យាបាល និង ថែទាំវេជ្ជសាស្ត្រ ការផ្តល់ប្រាក់បំណាច់ប្រចាំថ្ងៃ នៅពេលសម្រាកព្យាបាលជំងឺ ឬ គ្រោះថ្នា​ក់    ផ្សេងៗក្រៅពីហានិភ័យការងារ និង មាតុភាព ។

៩.   តាវកាលិកផ្នែកហានិភ័យការងារ     ៖   ការព្យាបាល និង ថែទាវេជ្ជសាស្ត្រ វិភាជន៍ ឬ ធនលាភបាត់បង់សមត្ថភាពការងារ សម្រាប់ផ្តល់ ជូនកម្មករនិយោជិត មន្ត្រីសាធារណៈដែលរង គ្រោះដោយគ្រោះថ្នាក់ការងារ គ្រោះថ្នាក់ពេលធ្វើ ដំណើរ ឬ ជំងឺវិជ្ជាជីវៈ និង ធនលាភឧត្តរជីវី សម្រាប់ផ្តល់ជូនសិទ្ធិវន្តនៃជនរងគ្រោះ ដែលរងគ្រោះថ្នាក់ការងារ គ្រោះថ្នាក់ពេលធ្វើដំណើរ ឬ ជំងឺវិជ្ជាជីវៈ ដែលបណ្តាលឲ្យបាត់បង់ជីវិត ។

១០.                                                                តាវកាលិកផ្នែកថែទាំសុខភាព       ៖          សំដៅដល់របបធានារ៉ាប់រងសង្គម ដែលត្រូវផ្តល់កញ្ចប់តាវកាលិកសុខភាព និង សេវាបង្ការចំពោះ គ្រោះថ្នាក់ការងារ ឬ ជំងឺដែលមិនពាក់ព័ន្ធនឹង ហានិភ័យការងារ ។

១១.   តាវកាលិកព្យាបាល                          ៖   សោហ៊ុយសម្រាប់ការព្យាបាល​ ដែលសាមីជន រងគ្រោះ ឬ អ្នកតំណាងបានចំណាយមុន ។

១២.  តាវកាលិកថែទាំ                                ៖   ប្រាក់បំណាច់សម្រាប់ផ្តល់ឲ្យអ្នកថែទាំជនរងគ្រោះ ក្នុងរយៈពេលសម្រាកនៅមន្ទីរពេទ្យ ។

១៣.  តាវកាលិកបាត់បង់សមត្ថភាពការងារបណ្តោះអាសន្ន  ៖   ប្រាក់បំណាច់សម្រាប់ផ្តល់ ឲ្យជនរងគ្រោះ ដែលអាក់ខានធ្វើការងារចាប់ពី ២ថ្ងៃ ឡើងទៅ ។

១៤.   តាវកាលិកបាត់បង់សមត្ថភាពការងារអចិន្ត្រៃយ៍      ៖   ប្រាក់បំណាច់ សម្រាប់ផ្តល់ឲ្យ ជនរងគ្រោះដែលខូចខាត ឬ បាត់បង់ផ្នែកណាមួយនៃកាយសម្បទាជាអចិន្ត្រៃយ៍ ។

១៥.   តាវកាលិកអ្នកចាំថែរក្សា                 ៖   ប្រាក់បំណាច់ សម្រាប់ផ្តល់ឲ្យអ្នកមើលថែជនរង គ្រោះបាត់បង់សមត្ថភាពការងារអចិន្ត្រៃយ៍ ដែលតម្រូវឲ្យមានអ្នកចាំមើលថែជាប្រចាំ ។

១៦.   ទុព្វលភាព                                           ៖   ភាពទន់ខ្សោយនៃកម្លាំងដែលកើតមានមុនអាយុ ចូលនិវត្តន៍ ។

១៧.  ធនលាភ                                              ៖   ប្រាក់ឧបត្ថម្ភដល់ ជនបាត់បង់សមត្ថភាពការងារ អចិន្ត្រៃយ៍ ដោយសារហានិភ័យការងារចាប់ពី ២០% ឡើងទៅ ។

១៨.   បច្ចេកទេសវិជ្ជាជីវៈវេជសាស្ត្រ     ៖   សំដៅដល់វិធីសាស្ត្រនៃការធ្វើរោគវិនិច្ឆ័យ ការ   ផ្តល់សេវាថែទាំ ដែលផ្តល់ដោយអ្នកបញ្ចប់ការសិក្សាខាងផ្នែកសុខាភិបាល ហើយត្រូវបានចុះ បញ្ជិកាជាមួយគណៈវិជ្ជាជីវៈពេទ្យ និង ត្រូវបានអនុញ្ញាតច្បាប់ ឲ្យប្រកបមុខរបរតាមវិជ្ជាជីវៈ ដោយក្រសួងសុខាភិបាល ​។

១៩.   បុរេប្រទានចំណាយ                           ៖   ការបើកប្រាក់ចំណាយឲ្យមុន ដោយសំអាងលើ ឯកសារ (Advance) ។

២០.  ប្រធានសក្តិ                                         ៖   ហេតុការណ៍​ ដែលកើតឡើងក្រៅពីឆន្ទៈរបស់មនុស្ស និង មិនអាចទប់ស្កាត់បាន ។

២១.  ភាគទាន                                              ៖   ប្រាក់ដែលកម្មករនិយោជិត និយោជក ឬ មន្ត្រីសាធារណៈ អតីតមន្ត្រីរាជការ និង អតីតយុទ្ធជន ព្រមទាំងរដ្ឋត្រូវបង់តាមច្បាប់ ទុកជាមូលនិធិ  សម្រាប់ការផ្តល់តាវកាលិក​ ។

២២. មរណភាព                                           ៖   ការស្លាប់

២៣. មាតុភាព                                              ៖   ការសម្រាកមុន និង ក្រោយពេលសម្រាលកូន ។

២៤.  មូលដ្ឋានសុខាភិបាល                         ៖   អង្គភាពព្យាបាលសាធារណៈ ឬ ឯកជនដែល ទទួលស្គាល់ដោយក្រសួងសុខាភិបាល ។

យ.រ.វ

២៥.  យន្តការទូទាត់សេវាផ្នែកថែទាំសុខភាព      ៖   សំដៅដល់ វិធីសាស្ត្រនៃការទូទាត់ថ្លៃ សេវាព្យាបាល និង ថែទាំវេជ្ជសាស្ត្រ សេវាបញ្ជូនអ្នកជំងឺ ឬ ជនរងគ្រោះ និង សេវាបញ្ជូនសពសម្រាប់ផ្នែកថែទាំ សុខភាព ។

២៦.  របបសន្តិសុខសង្គមផ្នែកហានិភ័យការងារ   ៖   ការធានារ៉ាប់រងចំពោះគ្រោះថ្នាក់ការងារ គ្រោះថ្នាក់ពេលធ្វើដំណើរ និង ជំងឺវិជ្ជាជីវៈ ។

២៧. របបសន្តិសុខសង្គមផ្នែកថែទាំសុខភាព        ៖   ការធានារ៉ាប់រងសុខភាពសង្គម ដែលត្រូវផ្តល់ការគាំពារចំពោះគ្រោះថ្នាក់ ឬ ជំងឺ ដែលមិនពាក់ព័ន្ធនឹងហានិភ័យ ការងារ ។

២៨.  វិភាជន៍បូជាសព                                ៖   ប្រាក់ សម្រាប់ផ្តល់ឲ្យអ្នកដែលបានចំណាយ សម្រាប់បូជាសព ។

២៩.  វិធីសាស្ត្រទូទាត់តាមករណី              ៖   ការទូទាត់ក្នុងអត្រាថេរមួយ ដែលគ្របដណ្តប់លើ គ្រប់តម្លៃសេវាសម្រាប់មួយករណីនៃអ្នកជំងឺម្នាក់ ឬ ប្រភេទជំងឺជាក់លាក់ណាមួយ ។

៣០.  វិធីសាស្ត្រទូទាត់តាមប្រភេទសេវា ៖   ការទូទាត់ថ្លៃសេវា ដោយផ្អែកទៅលើប្រភេទ   សេវាផ្សេងៗគ្នា ហើយមានតម្លៃដាច់ដោយឡែកពីគ្នា ។

ស.ហ

៣១.  សមាជិក ប.ស.ស                               ៖   កម្មករនិយោជិត ដែលបានបម្រើការងារនៅក្នុង សហគ្រាស គ្រឹះស្ថាន ហើយបានចុះបញ្ជិកានៅ ប.ស.ស ។

៣២. សហគ្រាស គ្រឹះស្ថាន                          ៖   សំដៅដល់រោងចក្រ សហគ្រាស​ ឬ ក្រុមហ៊ុនទាំង ឡាយដែលបានចុះបញ្ជិកានៅ ប.ស.ស ។

៣៣.  សហព័ទ្ធ                                              ៖   សំដៅដល់ប្តី ឬ ប្រពន្ធដែលនៅមានចំណង      អាពាហ៍ពិពាហ៍ស្របច្បាប់ ។

៣៤.  សល្យសាស្ត្រ                                        ៖   ការវះកាត់តាមបែបវិទ្យាសាស្ត្រ ក្នុងគោលបំណង ព្យាបាល ។

៣៥.  សេវាស្តារនីតិសម្បទា                       ៖   សេវាព្យបាលថែទាំវេជ្ជសាស្ត្រ សម្រាប់របបថែទាំ សុខភាពក្នុងគោលបំណងជួយដល់ជនរងគ្រោះ រក្សា ស្តារ ឬ ធ្វើឲ្យប្រសើរឡើងវិញនូវ សមត្ថភាពជំនាញ និង មុខងារសម្រាប់រស់នៅប្រចាំថ្ងៃ និង​ ជំនាញប្រាស្រ័យទាក់ទងដែលបានបាត់បង់ ឬ ខូចខាតដោយសារជំងឺ ការរងរបួស ឬ ពិការភាព 

៣៦.  សេវាពិគ្រោះជំងឺក្រៅ                       ៖   សំដៅដល់សេវាពិនិត្យ និង ពិគ្រោះជំងឺក្រៅ ដោយមិនរាប់បញ្ចូលការសម្រាកព្យាបាលនៅក្នុង មន្ទីរពេទ្យ ។

៣៧.  សេវាបង្ការសុខភាព                          ៖   សំដៅដល់ ការធ្វើរោគវិនិច្ឆ័យទាន់ពេលវេលា កំណត់អត្តសញ្ញាណអ្នកដែលមានហានិភ័យសុខភាព និង មានបញ្ហាសុខភាពជាក់លាក់ ការផ្តល់ប្រឹក្សា និង អន្តរាគមន៍ចាំបាច់ដទៃទៀត ដើម្បីការពារកុំឲ្យមានបញ្ហាសុខភាព មានជាអាទិ៍ ការស្រាវជ្រាវរកជំងឺ ការអប់រំសុខភាព និង កម្មវិធីចាក់ថ្នាំបង្ការ ។

៣៨.  សេវាសុខាភិបាល                              ៖   សំដៅដល់សេវាព្យាបាល និង ថែទាំវេជ្ជសាស្ត្រ សេវាបង្ការសុខភាព សេវាបញ្ជូនអ្នកជំងឺ ឬ ជន រងគ្រោះ និង សេវាបញ្ជូនសព ។

៣៩.  សេវាព្យាបាលនិងថែទាំវេជ្ជសាស្ត្រ    ៖       សំដៅដល់សេវាវេជ្ជសាស្ត្រ អមវេជ្ជសាស្ត្រ និង ជំនួយវេជ្ជសាស្ត្រ ។

៤០.   សេវាវេជ្ជសាស្ត្រ                               ៖   សំដៅដល់ការពិគ្រោះជំងឺក្រៅ និង សម្រាកពេទ្យ

៤១.   សេវាអមវេជ្ជសាស្ត្រ                         ៖   សំដៅដល់សេវាមន្ទីរពិសោធន៍ និង​​ រូបភាពវេជ្ជ សាស្ត្រ ។

៤២.  សេវាជំនួយវេជ្ជសាស្ត្រ                    ៖   សំដៅដល់ការព្យាបាលដោយស្អំ និង ដោយចលនា ។

៤៣.  សិទ្ធិវន្ត                                                ៖   ជនដែលមានសិទ្ធិទទួលបានអត្ថប្រយោជន៍របស់ សមាជិករបស់ ប.ស.ស ។

អ

៤៤.   អតីតមន្ត្រីរាជការ                               ៖   សំដៅដល់និវត្តជន និង ជនបាត់បង់សម្បទារវិជ្ជា ជីវៈ ។

៤៥.   អតីតយុទ្ធជន                                     ៖   សំដៅដល់និវត្តជន ជនពិការ និង ជនបាត់បង់សមត្ថភាពការងារ ។

៤៦.   អន្តរាគមន៍                                  ៖  សកម្មភាពព្យាបាល ឬ ជួយសង្គ្រោះជនរងគ្រោះ ឬ អ្នកជំងឺដែលស្ថិតក្នុងស្ថានភាពវឹកវរ ។

៤៧.  អាណាប័កដើមខ្សែ                            ៖   គឺជារដ្ឋមន្ត្រី ឬ ប្រធានស្ថាប័នដែលមានសិទ្ធិពេញលេញក្នុងការបញ្ជាប្រតិបត្តិការចំណូល និង ចំណាយថវិកាដោយខ្លួនឯងផ្ទាល់ ដោយត្រូវគោរពទៅតាមព្រំដែននៃសិទ្ធិអំណាច និង មុខងាររបស់ខ្លួន ។

៤៨.   អាណាប័កផ្ទេរសិទ្ធិ                             ៖   សំដៅដល់ប្រធានអង្គភាពថវិកានៃក្រសួង ស្ថាប័ន ថវិកាកម្មវិធី ដែលទទួលបានការប្រគល់សិទ្ធិពី អាណាប័កដើមខ្សែ សម្រាប់កិច្ចសហប្រតិបត្តិការ ហិរញ្ញវត្ថុថវិកា ។

៤៩.   ឧត្តរជីវី                                               ៖   ប្រាក់បំណាច់សម្រាប់ផ្តល់ឲ្យអ្នកនៅក្នុងបន្ទុក ផ្ទាល់របស់ជនរងគ្រោះថ្នាក់ការងារ បណ្តាលឲ្យ​បាត់បង់ជីវិត ។

 

Read More